Azərbaycan Respublikası Mədəniyyət və Turizm Nazirliyi, AMEA, Arxeologiya və Etnoqrafiya İnstitutu, Regionların İnkişafı İctimai Birliyinin birgə layihəsi üzrə «Çaşıoğlu» mətbəəsində «Orta əsr Şəmkir şəhər yeri. Şəmkir arxeoloji ekspedisiyasının tədqiqatları. 2009» adlı kataloq çap olunub. Kataloqda Şəmkir şəhər yerində 2009-cu ildə aparılmış arxeoloji qazıntıların başlıca yekunları haqqında məlumat, qazıntı prosesi və üzə çıxarılan tikinti qalıqlarından görüntülər, müxtəlif təyinatlı tapıntıların illüstrasiyaları cəmləşmişdir.
Kataloq arxeoloq və tarixçilər, mədəniyyət işçiləri, geniş oxucu kütləsi üçün nəzərdə tutulub.

2009-cu ildə Azərbaycan MEA Arxeologiya və Etnoqrafiya İnstitutu, Regionların İnkişafı İctimai Birliyi və Azərbaycan Respublikası Mədəniyyət və Turizm Nazirliyinin birgə layihəsi üzrə orta əsr Şəmkir şəhər yerində stasionar, geniş miqyaslı arxeoloji qazıntılar davam etdirilmiş, tədqiqat işləri III-VI qazıntı sahələrində olmaqla eyni vaxtda dörd sahədə aparılıb.

Orta əsr Şəmkir şəhər yerində 2006-2009-cu illərdə aparılan arxeoloji qazıntılar nəticəsində üzə çıxarılan tikinti qalıqları, ilk növbədə istehkam tikintilərin mövcud vəziyyəti eyni olmayıb bəzi sahələrdə uçma ehtimalı böyükdür.

2009-cu il oktyabrında arxeoloji tədqiqatlar, əsasən V qazıntı sahəsində davam etdirilib. Burada şəhər qalasının şərq divarının şimal-şərq künc bürcü və ona şimali-şərqdən birləşən divar qalıqları üzə çıxarılıb və təmizlənib. Sonuncu çaydaşlarından hörülüb və üzə çıxarılmış qalıqlarının uzunluğu 6,9 m, hündürlüyü isə 1,8 m-dir. Bürcün şimal tərəfində təmir izləri aydın nəzərə çarpır.

2009-cu ilin sentyabrında çöl arxeoloji işləri IV və V qazıntı sahələrində aparılıb. IV qazıntı sahəsi 4 m şimala genişləndirildi. Yeni kvadratlarda (12 a-e kvadratları) üst mədəni təbəqə 60-70 sm qalınlıqda XIX əsrə aiddir. Burada çaydaşından və bişmiş kərpiç paralarından hörülmüş tikili qalıqları, dirək çuxurları, eləcə də dirək qalığı üzə çıxarılmışdır.